Chanson médiévale, France. Tirée du Manuscrit de Bayeux (XVe siècle).

1.
A mon venir de mon advenement,
J'avois bon bruit, mais par ma grant laidure,
Tout aussi tost qu'avoye gagné argent
Au cuir à poil, m'en alloye grant allure,
Viellesse m'a donné de sa poincture.
Je ne me puis remettre à labourer.
Ce poise moy :
S'i ne me vient quelque bone advanture,
Il m'y fauldra la guerre habandonner.

2.
Jadys soulloys chevaucher noblement
A trois roussins, bruiant oultre mesure ;
Mais maintenant il me va autrement,
Je vais à pié, par faulte de monture,
Et si me fault pourchasser ma posture,
A travers champs aller et trecasser.
Ce poise moy :
S'i ne me vient quelque bone adventure,
Il m'y fauldra la guerre habandonner.

3.
Gentils gallans, qui bevez hardiment
De ce bon vin, à pot et sans mesure,
Bevez à moy, je vous prie humblement,
Et gardez bien que ne grevez nature.
Ne prenez pas si pesante vainture
Qu'il vous faille en ung brief coup ruer
Comme a faict moy,
S'i ne me vient quelque bone adventure,
Il m'y fauldra la guerre habandonner.

4.
Garny je suis, si très parfaictement,
D'or et d'argent, de chevaulx et d'armeure,
Et d'aultres biens aussi escarcement
Je n'ay pourpoint, ne robe, ne saincture
Que tout ne soit engagé par usure.
Je ne me puis remettre à labourer.
Ce poise moy :
S'i ne me vient quelque bone adventure,
Il m'y fauldra la guerre habandonner.